Ish-deputeti Nait Hasani, gjatë një interviste në emisionin "DPT Te Fidani" në televizionin Klan Kosova, ka adresuar procesin gjyqësor që po zhvillohet në Hagë ndaj ish-krerëve të Ushtrisë Çlirimtare të Kosovës. Hasani ka lëshuar një paralajmërim të ashpër, duke thënë se në rast të një vendimi dënues, "Kosova do të digjet" dhe në vend nuk do të ketë më qetësi.
Sipas Hasanit, procesi gjyqësor ndaj ish-krerëve të UÇK-së nuk duhet të trajtohet si çështje individuale, pasi në thelb, sipas tij, po gjykohet lufta dhe vetë shtetësia e Kosovës. "Na cenohet liria jonë, shteti ynë, lufta jonë, gjaku i dëshmorëve. Prandaj, të dënohet Ushtria Çlirimtare e Kosovës, dënohet shteti i Kosovës", ka deklaruar ai.
Duke iu drejtuar faktorit ndërkombëtar dhe gjykatës, Hasani nënvizoi se asnjë ushtar i UÇK-së nuk duhet të dënohet. Ai shprehu pritshmërinë se ky proces gjyqësor do të përmbyllet me lirimin e të akuzuarve në datën 16 shtator.