Nassur Bacem, mbrojtës i majtë 27-vjeçar me origjinë angolane i skuadrës Lusitano Ginásio Clube Moncarapachense, vdiq në fushë gjatë një ndeshjeje të zhvilluar të mërkurën në mbrëmje në Stadiumin Komunal të Olhão, në rajonin Algarve të Portugalisë.
Ngjarja ndodhi në minutën e 27-të të pjesës së parë të sfidës së raundit të tretë të Kupës Algarve kundër Imortal DC. Lojtari u rrëzua papritur për shkak të një arresti kardiak. Stafi mjekësor i të dy ekipeve, përfshirë mjekun dhe fizioterapistin e Moncarapachense, si dhe përgjegjësit e ndihmës bazë në stadium, ndërhynë menjëherë. Më pas mbërritën shërbimet e Institutit të Emergjencës Mjekësore (INEM), të cilët kryen manovra reanimimi për një kohë të gjatë, por lojtari u shpall i vdekur në vend.
Klubi Lusitano Ginásio Clube Moncarapachense, që luan në divizionin e katërt portugez, konfirmoi vdekjen me një njoftim në rrjetet sociale, shoqëruar me një foto të Bacemit me fanellën verdheblu. Presidenti Nemésio Martins deklaroi se ngjarja ishte e papritur dhe se nuk pati kohë për ndërhyrje të mjaftueshme, pavarësisht pranisë së mjekut.
Bacem kishte filluar karrierën te sektori i të rinjve i Sporting Braga-s, para se të vazhdonte në kampionatet kombëtare. Klubi ftoi komuniteten futbollistik të qëndrojë pranë familjes së lojtarit.