NATO po zhvillon në Letoni manovrat më të mëdha të organizuara ndonjëherë për dislokimin e një brigade shumëkombëshe, në kuadër të përpjekjeve për të forcuar mbrojtjen e krahut lindor të Aleancës. Stërvitja, e koduar “Resolute Reforger 2026”, nisi më 26 tetor dhe do të zgjasë deri më 8 nëntor. Në të marrin pjesë rreth 3 000 ushtarakë dhe 1 000 mjete e pajisje ushtarake.
Manovrat zhvillohen në pjesën lindore të Letonisë, në zona pranë kufijve me Rusinë dhe Bjellorusinë. Deri më 2 nëntor, trupat dhe pajisjet ushtarake po zhvendosen nga bazat Adazi dhe Ceri drejt zonave të stërvitjes, përmes rrugëve tokësore dhe hekurudhave. Aktivitetet përfshijnë rajonet Ogre, Jēkabpils, Aizkraukle, Daugavpils, Alūksne, Balvi, Gulbene, Madona, Rēzekne dhe Augšdaugava.
Gjatë manovrave, ushtarët ushtrojnë zhvendosjen e shpejtë të trupave në distanca të largëta, furnizimin me pajisje dhe materiale të nevojshme, drejtimin e operacioneve ushtarake dhe komunikimin ndërmjet njësive. Një tjetër objektiv është forcimi i bashkëpunimit mes brigadës shumëkombëshe të NATO-s dhe Forcave të Armatosura Kombëtare të Letonisë.
Komandanti i brigadës shumëkombëshe të NATO-s në Letoni, koloneli David Brassard, tha se stërvitja synon të provojë aftësinë e trupave për t’u zhvendosur në distanca të largëta, për të siguruar furnizimet e nevojshme dhe për të ruajtur komunikimin e koordinimin gjatë operacioneve. Ai theksoi se mbrojtja e Letonisë kërkon që trupat aleate të jenë në gjendje të veprojnë edhe jashtë bazave ushtarake, në bashkëpunim me forcat vendase dhe duke ruajtur lidhjet mes njësive të shpërndara në terren.
Nga 4 deri më 8 nëntor, trupat do të përqendrohen në pastrimin e zonave të përdorura gjatë manovrave dhe më pas do të kthehen në bazat e tyre. Sipas autoriteteve letoneze, kjo është stërvitja më e madhe e zhvilluar deri tani nga Brigada Shumëkombëshe e NATO-s në Letoni për dislokimin e forcave ushtarake. Manovrat zhvillohen ndërsa Letonia, Lituania dhe Estonia po forcojnë kapacitetet e tyre mbrojtëse përballë shqetësimeve të sigurisë që lidhen me Rusinë.