Erald Samarxhi, infermier 39-vjeçar në Spitalin e Infektivit pranë Qendrës Spitalore Universitare Nënë Tereza (QSUT), ka ndarë jetën më 27 shkurt 2026.
Lajmin e bëri publik Shoqata e Infermierëve të Shqipërisë përmes një njoftimi në rrjetet sociale. Shoqata shkruan se Samarxhi kishte punuar prej shumë vitesh në atë spital dhe ishte shembullor për përkushtimin ndaj punës dhe pacientëve.
Në njoftimin e saj, shoqata thekson se ai la një dhimbje dhe boshllëk të madh te familja, kolegët dhe të gjithë ata që e njihnin. Kontributi i tij ishte i pashoq sidomos gjatë pandemisë, kur u gjend pranë njerëzve në nevojë.
Njoftimi i plotë i Shoqatës së Infermierëve të Shqipërisë:
"Një lajm i dhimbshëm vjen nga radhët e infermierëve: sot ndahet nga jeta kolegu ynë, infermieri Erald Samarxhi, në moshën 39-vjeçare.
Prej shumë vitesh infermier në Spitalin e Infektivit të QSUT, një djalë shembullor dhe i dashur, i përkushtuar ndaj punës dhe pacientëve. Sot la një dhimbje dhe boshllëk të madh tek familja, kolegët dhe të gjithë ata që e njihnin.
Me një kontribut të pashoq sidomos në kohën e pandemisë, por dhe në çdo moment i gjendur sa herë njerëzit kishin nevojë. Pushoftë në paqe, koleg.
Shoqata e Infermierëve të Shqipërisë shpreh ngushëllime të përzemërta familjes, kolegëve dhe miqve që e njihnin Eraldin."