Futbolli shqiptar është në zi për ndarjen nga jeta të Besnik Çotës, një prej figurave më të respektuara të historisë së klubit Sopoti i Librazhdit. Çota u shua mbrëmjen e së mërkurës në një spital të Tiranës, ku ndodhej nën kujdes mjekësor pas një sëmundjeje të rëndë me të cilën po përballej prej vitesh, përfshirë trajtimin e vazhdueshëm me dializë.
Gjatë karrierës së tij si futbollist në vitet '90, Besnik Çota u shqua si mesfushor organizator, duke spikatur për teknikën e lartë, vizionin në lojë dhe aftësitë drejtuese. Si kapiten i Sopotit, ai udhëhoqi skuadrën në shumë përballje të rëndësishme, duke lënë gjurmë të pashlyeshme në historinë e futbollit lokal.
Pas përfundimit të karrierës si lojtar, Çota nuk u shkëput nga sporti, duke zgjedhur rrugën e trajningut. Ai punoi për shumë vite me ekipet zinxhir të klubit, përpara se të merrte drejtimin e skuadrës së parë. Brezat e rinj të futbollistëve e kujtojnë atë si një profesionist të matur, të drejtë dhe të palodhur. Humbja e tij është cilësuar si një goditje e madhe për komunitetin sportiv të Librazhdit, ku ai gëzonte respekt të thellë si sportist dhe si njeri.
Përditësime
Klubi i Futbollit Sopoti njoftoi ndarjen nga jeta të ish-kapitenit Besnik Çota në moshën 56-vjeçare. Klubi vlerësoi kontributin e tij jetësor, duke veçuar 12 vitet në rolin e kapitenit dhe rolin e tij kyç gjatë periudhës kur ekipi garonte në elitën e futbollit shqiptar.