Futbolli shqiptar është në zi pas njoftimit për ndarjen nga jeta të ish-mbrojtësit të shquar, Esat Bushati. Lajmi është bërë i ditur nga klubi i Vllaznisë, i cili ka vlerësuar kontributin e dhënë nga Bushati për fanellën kuqeblu gjatë viteve ’40-’60. Përveç karrierës me skuadrën shkodrane, Bushati ka luajtur edhe për Partizanin, duke u konfirmuar si një nga mbrojtësit më të spikatur të kohës së tij, ndërsa ka mbajtur edhe fanellën e Kombëtares shqiptare.
Kryetari i Bashkisë së Shkodrës, Benet Beci, ka reaguar për këtë humbje duke e cilësuar Bushatin si një nga emrat më të respektuar të historisë së futbollit shkodran. Sipas njoftimeve zyrtare, ceremonia e homazheve për nder të tij do të zhvillohet të premten, nga ora 10:00 deri në 12:00, në ambientet e stadiumit Loro Boriçi.
Karriera e Esat Bushatit konsiderohet një pasuri për futbollin tonë, me një angazhim disavjeçar që ka lënë gjurmë të pashlyeshme te tifozët dhe komunitetin sportiv. Klubi i Vllaznisë ka shprehur ngushëllimet më të thella për familjen e të ndjerit, duke e kujtuar atë si një personalitet që i përkushtoi jetën sportit dhe fanellës kuqeblu.