Autoritetet në Kosovë kanë ndaluar të dielën 34 persona prej 43 të intervistuarve, të cilët dyshohen për manipulim të votave të kandidatëve në zgjedhjet e parakohshme parlamentare të 28 dhjetorit. Masa e ndalimit u është caktuar për 48 orë.
Prokuroria Themelore në Mitrovicë ka urdhëruar Departamentin e Hetimeve të Policisë së Kosovës të intervistojë kryesuesit e Qendrave Komunale të Numërimit në komunat:
- Mitrovicë e Veriut,
- Mitrovicë e Jugut,
- Leposaviq,
- Zubin Potok,
- Zveçan.
Ditëve të fundit, autoritetet kanë intervistuar qindra persona në komuna të ndryshme dhe kanë ndaluar dhjetëra të tjerë për dyshime të ngjashme. Gjatë procesit të rinumërimit, votat për disa kandidatë ndryshuan, me raste deri në 6 mijë për një individ, ndërsa ato për partitë nuk u cenuan.
Sipas Kodit Penal të Republikës së Kosovë, manipulimi i qëllimshëm i votës apo rezultatit zgjedhor përbën vepër penale dhe dënohet me deri në pesë vjet burgim. Për disa zyrtarë shtetërorë, ky proces është cilësuar si “më i komprometuar zgjedhor” në Kosovë, pavarësisht lavdërimeve të mëparshme nga organizata vendore e ndërkombëtare për zgjedhje të drejta dhe transparente.
Komisioni Qendror i Zgjedhjeve (KQZ) përfundoi rinumërimin të premten në mbrëmje dhe publikoi rezultatet përfundimtare të shtunën. Anëtarët e KQZ-së miratuan listat e kandidatëve të të gjitha partive, përveç asaj të Listës Serbe, partisë më të madhe të serbëve në Kosovë.
Lista Serbe dhe Beogradi zyrtar reaguan ashpër ndaj këtij vendimi, duke paralajmëruar ushtrimin e ankesës. Kryetari i KQZ-së, Kreshnik Radoniqi, deklaroi se palët mund ta shfrytëzojnë të drejtën e ankesës brenda 48 orëve pas shpalljes së rezultateve.
Eugen Cakolli nga Instituti Demokratik i Kosovës (KDI) komentoi në Facebook se KQZ-ja ka kryer shkelje, duke shpallur rezultate pa u konsumuar afati ligjor për ankesa dhe më pas duke publikuar rezultate të pjesshme.
Përditësime
Lista Serbe dorëzoi ankesë zyrtare në PZAP kundër vendimit të KQZ-së për mosmiratimin e listës së tyre.
Igor Simić e cilësoi vendimin si "të paligjjshëm, anti-serb dhe diskriminues" dhe mohoi 42.759 vota serbe.
Në votimin e KQZ-së: 3 pro, 2 kundër (nga Vetëvendosje), të tjerët abstenuan.
Reagime të reja:
- Misioni i OSBE-së ndjek zhvillimet dhe thekson nevojën për transparencë.
- Ministri serb Marko Đurić dënon vendimin si sulm ndaj të drejtave serbe.
Prokuroria Themelore në Prishtinë autorizoi Drejtoria e Hetimeve të Krimeve Ekonomike dhe Korrupsionit për hetime mbi parregullsi në numërimin e votave në Podujevë.
Prokuroria në Gjakovë ka ndaluar për 48 orë një kryesues në Malishevë më 2 shkurt.
Gjatë aksionit të 28 janarit në Gjakovë:
- U intervistuan 15 kryesues dhe 43 komisionerë.
- U ndaluan 15 kryesues për një muaj.
- Caku ishte 18 kryesues dhe 50 komisionerë.
Në Malishevë, në 75 vendvotime u shtuan 9.057 vota dhe u hoqën 7.996 vota, në total 17.053 vota.
Kryeprokurori Enis Gashi dha deklaratë, ndërsa Laura Pula paralajmëroi hetime ndaj kandidatëve.