Një aksident me pasojë vdekjen ka ndodhur gjatë ditës së sotme, më 20 gusht 2026, në ambientet e Korporatës Energjetike të Kosovës (KEK). Viktima, Arbenit Ahmeti, ka humbur jetën ndërsa ishte duke kryer detyrat e punës, konkretisht gjatë procesit të transportit dhe zhvendosjes së kabllove me tension 6kV. Sipas informacioneve fillestare, viktima dyshohet se ka rënë në kontakt me rrymën elektrike, duke pësuar lëndime të rënda, të cilat u treguan fatale pavarësisht përpjekjeve të stafit mjekësor në Ambulancën e Obiliqit.
Në lidhje me këtë ngjarje, Prokuroria Themelore në Prishtinë ka ndërmarrë veprime të menjëhershme hetimore. Është ndaluar për 48 orë një person me inicialet A.K., i cili dyshohet për kryerjen e veprës penale "Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës", sipas nenit 358 të Kodit Penal të Republikës së Kosovës.
Në vendin e ngjarjes kanë dalë njësitet përkatëse të Polisisë së Kosovës, Komisioni i Pavarur për Miniera dhe Minerale (KPMM), Inspektorati i Punës dhe Inspektorati i Brendshëm i KEK-ut, për të sqaruar rrethanat e plota të ngjarjes. Prokuroria ka njoftuar se brenda afateve ligjore do të shqyrtojë provat e grumbulluara për të vendosur për masat e mëtejshme ndaj të dyshuarit.
Sipas raportimeve nga Kallxo, ky rast shënon vdekjen e tretë të një punëtori në KEK brenda pak më shumë se një muaji. Më 16 gusht 2026, humbi jetën Haxhi Gojnovci, ndërsa më 15 korrik 2026 ndërroi jetë Milazim Binaku si pasojë e lëndimeve të marra gjatë punës.
Përditësime
Mjekësia ligjore konfirmoi se 32-vjeçari Arbenit Ahmeti humbi jetën si pasojë e kontaktit me tensionin elektrik gjatë punës. Sindikata e Re e KEK-ut reagoi zyrtarisht ndaj rastit, duke kërkuar masa urgjente për sigurinë në vendet e punës.