Aktorja e mirënjohur Brenda Fricker është ndarë nga jeta në moshën 81-vjeçare. Lajmin e ka konfirmuar agjenti i saj, Phil Belfield, i cili e përkujtoi atë si një artiste të pazëvendësueshme, duke deklaruar se bota është më e varfër pa të.
E lindur në Dublin, Fricker hyri në histori në vitin 1990, kur u bë aktorja e parë irlandeze që fitoi një çmim Oscar. Ajo u vlerësua në kategorinë Aktorja më e Mirë në Rol Dytësor për interpretimin e saj në filmin “My Left Foot” (1989), ku luajti përkrah Daniel Day-Lewis. Filmi rrëfente historinë e vërtetë të artistit Christy Brown.
Për publikun e gjerë ndërkombëtar, aktorja mbetet e paharrueshme për rolin e “zonjës së pëllumbave” në filmin “Home Alone 2: Lost in New York” (1992). Gjithashtu, karriera e saj televizive është shënjuar nga roli i infermieres Megan Roach në serialin mjekësor britanik “Casualty”, ku ajo u shfaq për herë të parë në vitin 1986 dhe vijoi bashkëpunimin deri në vitin 2010.
Gjatë karrierës së saj të gjatë mbi gjashtë dekada, ajo mori pjesë në prodhime të tjera të njohura kinematografike, si:
- “So I Married an Axe Murderer” (1993)
- “Angels in the Outfield” (1994)
- “A Time to Kill” (1996)
- “Veronica Guerin” (2003)
Përditësime
Burimet zyrtare në Dublin konfirmuan ndarjen nga jeta të aktores fituese të çmimit Oscar, Brenda Fricker (17 shkurt 1945). Komuniteti artistik ka shprehur ngushëllimet për humbjen e ikonës së skenës. Në një rrëfim të vitit 2020, aktorja kishte ndarë publikisht përjetimet e saj mbi vetminë gjatë periudhës së festave.
Aktorja fituese e çmimit Oscar, Brenda Fricker, kishte shprehur më parë rezerva mbi ndikimin e këtij çmimi në karrierën e saj. Në një intervistë për The Times në vitin 2024, ajo e përshkroi vlerësimin si një 'mallkim', duke shpjeguar se ai kufizoi mundësitë e saj profesionale dhe angazhimet në teatër.