Milani humbi ndaj Parmas në San Siro, në një ndeshje ku trajneri kryesor Massimiliano Allegri ishte i pezulluar. Analizën e bëri ndihmëstrajneri Marco Landucci, i cili konfirmoi se skuadra synon kualifikimin në Champions League dhe jo titullin kampion.
“Nuk jemi të kënaqur, Parma bëri një ndeshje shumë të mirë. Sot topi nuk donte të hynte në portë. Duhet të mendojmë se të martën rifillojmë. Jemi të zhgënjyer sepse donim tre pikët: kemi bërë shumë rezultate pozitive, por tani nisim sërish”, tha Landucci për Sky.
Ai shtoi se skuadra është e mërzitur dhe se duhet të fokusohen në rrugëtimin e tyre: “Nuk duhet të mendojmë për të tjerët, por për rrugëtimin tonë, të bëjmë sa më shumë pikë: duhet të synojmë rikthimin në Champions League. Kjo skuadër ka bërë shumë pikë me këtë qëndrim. Kur nuk shënon dhe nuk fiton, duket sikur çdo gjë është gabim. Parma ishte shumë e fortë dhe luftoi për çdo top. Ne ishim edhe disi të pafat, por ky është futbolli.”
Sa i përket vështirësive ndaj skuadrave më të vogla, Landucci vlerësoi kampionatin italian: “Është shumë i vështirë: çdo ndeshje ka kurthet e veta dhe ka shumë ekuilibër. Besoj se është më i vështiri në botë. Sonte u përpoqëm të japim maksimumin dhe nuk ia dolëm. Të martën rifillojmë dhe mendojmë për ndeshjen e radhës.”
Ndërkohë, ndeshja u komplikua nga dëmtimet: “Mateo Gabbia u dëmtua në nxehje, edhe Ruben Loftus-Cheek po ashtu: një mbrëmje paksa e veçantë.”