Këshilli i Ministrave ka vendosur lirimin nga detyra të Altin Jani nga posti i drejtorit të Përgjithshëm të Autoritetit Kombëtar për Sigurinë e Informacionit të Klasifikuar (AKSIK). Në të njëjtin vendim, në krye të këtij institucioni është emëruar Ermal Jauri. Vendimi për këto ndryshime administrative është marrë në mbështetje të nenit 100 të Kushtetutës dhe ligjit nr. 10/2023, duke hyrë në fuqi menjëherë pas botimit në Fletoren Zyrtare.
Altin Jani e mbante postin e drejtorit të përgjithshëm që prej muajit prill të vitit 2024, ndërsa ishte pjesë e këtij institucioni që prej vitit 2012.
Drejtuesi i ri, Ermal Jauri, zotëron një përvojë të gjerë profesionale në fushën e sigurisë kombëtare dhe administratës publike. Karriera e tij përfshin shërbimin në Forcat e Armatosura Shqiptare, ku ka mbajtur detyra operacionale dhe stafore, përfshirë pjesëmarrjen në operacione ndërkombëtare në Irak. Ai ka shërbyer gjithashtu në Ministrinë e Brendshme si Zëvendës Koordinator Kombëtar për Kundërshtimin e Ekstremizmit të Dhunshëm dhe ka qenë pjesë e Agjencisë së Mbikëqyrjes së Policisë (AMP). Jauri aktualisht mban gradën Kapiten në Rezervë dhe është Kryetar i Shoqatës së Alumni-ve George C. Marshall Albania.