Një studim i publikuar në revistën eClinicalMedicine sugjeron se ndryshime të vogla në dietë, aktivitet fizik dhe gjumë, kur zbatohen së bashku, mund të zgjasin jetën me një vit. Ndërsa përmirësime më të mëdha dhe të qëndrueshme në këto fusha mund të shtojnë mbi nëntë vite jetë dhe të përmirësojnë cilësinë e saj.
Studimi, i udhëhequr nga Nick Koemel në Universitetin e Sydney-t në Australi, analizoi të dhëna nga rreth 60 mijë persona në Angli, Skoci dhe Uells, pjesë e studimit UK Biobank. Pjesëmarrësit raportuan për dietën, aktivitetin fizik dhe gjumin, ndërsa disa përdorën pajisje matëse. Për persona me zakone të dobëta, shtimi i 5 minutave gjumë, 2 minutave aktivitet fizik dhe gjysmë filxhani perime në ditë parashikon shtim rreth një viti jetë. Kombinimi i 42-103 minutave aktivitet fizik, 7-8 orëve gjumë dhe dietë të pasur me peshk, drithëra integrale, fruta e perime jep përfitimin më të madh. Autorët theksojnë se rezultatet janë teorike dhe bazuar në modele, jo prova shkak-pasojë. Statistikanët si Kevin McConway paralajmërojnë për interpretim të kujdesshëm.
Studimi në The Lancet
Një studim tjetër, i publikuar në The Lancet, përfshiu rreth 135 mijë persona nga Britania, SHBA-ja, Norvegjia dhe Suedia. Ai tregon se 5 minuta më shumë aktivitet fizik me intensitet të moderuar në ditë, si ecja e shpejtë, lidhet me ulje prej 10% të rrezikut të vdekjes së parakohshme midis shumicës dhe 6% midis më pak aktivëve. Ulja e kohës ulur me 30 minuta në ditë shoqërohet me ulje 7% të vdekjeve nga të gjitha shkaqet midis atyre që kalojnë 10 orë ulur dhe 3% midis sedentarëve.
Përfitimi më i madh shihet te 20% e popullsisë më pak aktive. 10 minuta më shumë aktivitet ulin rrezikun me 15% midis shumicës dhe 9% midis më pak aktivëve, ndërsa 1 orë më pak ulur ul me 13% dhe 6%. Studimi, i udhëhequr nga Shkolla Norvegjeze e Shkencave të Sportit, thekson ndikimin shoqëror, jo këshilla personale. Ekspertë si Aiden Doherty nga Oksfordi dhe Daniel Bailey nga Bruneli e quajnë premtuese, veçanërisht për moshën 50-70 vjeç kundër Alzheimerit dhe demencës.
Të dyja studimet nënvizojnë se sjelljet e shëndetshme duhen parë si paketë e përbashkët për efekte afatgjata.