Transferimi i futbollistit Drilon Hazrollaj te Tirana është ende në fazën e negociatave. Klubi shqiptar dhe Rapid Bukureshti kanë arritur një marrëveshje paraprake për huazimin e 22-vjeçarit, megjithatë futbollisti nuk ka dhënë ende miratimin përfundimtar.
Menaxheri i lojtarit, Kastriot Telaku, deklaroi se marrëveshja nuk ka dështuar, por theksoi se po shqyrtohen edhe opsione të tjera për karrierën e tij. Sipas raportimeve të mediave, përfshirë ProSport, një nga pengesat kryesore të bisedimeve lidhet me pagën mujore prej 9 mijë eurosh, një shumë që vlerësohet si e lartë për mundësitë financiare të klubit kryeqytetas.
Drilon Hazrollaj iu bashkua Rapid Bukureshtit në verën e vitit 2025 nga FC Malisheva për një shumë prej 900 mijë eurosh. Për shkak të dëmtimeve të njëpasnjëshme gjatë sezonit të kaluar, minutazhi i tij në kampionatin rumun ka qenë i kufizuar. Megjithatë, lojtari është rikuperuar dhe ishte pjesë e ekipit në ndeshjen e parë të sezonit kundër Sepsi, të cilën Rapid Bukureshti e fitoi me rezultatin 1-0.