Në protestën masive të mbajtur përpara godinës së Kryeministrisë, Florina Cani, nëna e Martin Canit, iu drejtua qytetarëve përmes një fjalimi në podiumin e improvizuar. Ajo denoncoi atë që e cilësoi si degradim të sistemit arsimor dhe shëndetësor, duke e lidhur ngjarjen tragjike të humbjes së jetës së djalit të saj 14-vjeçar me mungesën e sigurisë në institucione.
"E çova djalin në shkollë dhe nuk më u kthye më. Jo nga paedukata, por nga pakujdesia e atyre që kanë degraduar arsimin, shëndetësinë dhe të gjitha me radhë", deklaroi Florina Cani para turmës. Ajo theksoi se prej 18 muajsh proteston për të kërkuar drejtësi dhe përmirësimin e rendit në sistemin gjyqësor. Fjalimi i saj u shoqërua me thirrje kundër qeverisë aktuale dhe kërkesa për largimin e kryeministrit Edi Rama.
Prania e saj në shesh u cilësua nga të pranishmit si një thirrje e fuqishme për siguri në shkolla dhe përgjegjësi institucionale. Martin Cani humbi jetën si pasojë e një sulmi me thikë nga një bashkëmoshatar i tij, një rast që ka ngjallur reagime të gjera në opinionin publik për masat e sigurisë për të miturit.