Kryeministri i Izraelit, Benjamin Netanyahu, në një intervistë për rrjetin televiziv Channel 14, ka kritikuar ashpër qëndrimet e fundit të udhëheqjes turke. Ai e lidhi retorikën e Ankarasë me ndryshimet gjeopolitike në Lindjen e Mesme, duke e përshkruar Turqinë si pjesë të "boshtit të Vëllazërisë Myslimane", krahas ndikimit të Iranit në rajon.
Duke iu referuar pretendimeve të Rexhep Tajip Erdoganit mbi Jerusalemin, Netanyahu deklaroi se presidenti turk "ka harruar se 400 vitet e Perandorisë Osmane kanë mbaruar". Ai theksoi se sot ekziston një shtet i fortë, siç është Izraeli, dhe paralajmëroi se vendi nuk do të tolerojë asnjë kërcënim ndaj sigurisë së tij.
Tensionet diplomatike janë përshkallëzuar pas deklaratave të përsëritura nga zyrtarë të lartë turq. Mediat kanë raportuar se gjatë lutjeve të Fitër Bajramit në mars 2025, presidenti Erdogan kishte bërë thirrje për shkatërrimin e Izraelit, ndërsa ministri i Brendshëm i Turqisë kishte kërkuar më parë "çlirimin" e Jerusalemit.
Gjatë së njëjtës intervistë, Netanyahu foli edhe për sigurinë kufitare me Egjiptin. Ai konfirmoi zhvillimin e bisedimeve me autoritetet egjiptiane lidhur me praninë ushtarake në Gadishullin e Sinait, duke kërkuar respektimin strikt të marrëveshjeve ekzistuese mes dy vendeve për ruajtjen e stabilitetit rajonal.