Kryeministri izraelit Benjamin Netanyahu publikoi më 17 mars 2026 një video në platformën X, ku ironizon spekulimet në rrjetet sociale për vdekjen e tij. Në pamjet shfaqet takimi i tij me ambasadorin amerikan në Izrael, Mike Huckabee.
Ambasadori Huckabee, duke qeshur, i tha Netanyahut se Presidenti Donald Trump e kishte dërguar për të konfirmuar nëse ai është mirë. Netanyahu u përgjigj me buzëqeshje: "Po, Mike, jam gjallë."
Netanyahu ironizoi gjithashtu pretendimet se videot e tij të fundit ishin krijuar me inteligjencë artificiale. Ai tha: "Ne shtrëngojmë duart me pesë gishta në secilën dorë."
Gjatë takimit, Netanyahu tregoi një kartë me emrat e udhëheqësve të lartë iranianë që Izraeli po i shënjestron. Ai përmendi se kishte fshirë dy emra gjatë natës: Ali Larijani dhe Gholamreza Soleimani, të vrarë së fundmi. Netanyahu theksoi bashkëpunimin e ngushtë me Shtetet e Bashkuara.
"Ajo që po bëjnë presidenti dhe forcat amerikane është e pabesueshme. Ne jemi krenarë që qëndrojmë krah për krah me ta dhe po heqim qafe këta që synojnë armë bërthamore dhe mund t’i përdorin kundër qyteteve amerikane. Ata nuk do ta bëjnë këtë – ne do t’i zhdukim nga faqja e dheut", deklaroi ai.
Bashkëngjitur videos, Netanyahu shkroi: "Crossing names off the list is good – doing it shoulder to shoulder with our American friends is even better. Good to see Ambassador @GovMikeHuckabee. Always a pleasure." Videoja vjen pas përhapjes së teorive konspirative në rrjetet sociale, të cilat kryeministri i mohoi me humor dhe vendosmëri.