Benjamin Netanyahu, kryeministri i Izraelit, reagoi ndaj vëmendjes së ripërtërirë ndaj dosjeve të Jeffrey Epstein, të publikuar nga Departamenti Amerikan i Drejtësisë, duke deklaruar se ky i fundit “nuk ka punuar për Izraelin”.
Sipas The Jerusalem Post, lidhjet e ish-kryeministrit Ehud Barak me Epstein morën vëmendje mediatike për shkak të takimeve të tyre të shumta në vitet 2015 dhe 2016, vite pas dënimit të parë penal të Epstein. Fotografi tregojnë Barakun duke hyrë në rezidencën e Epstein në Manhattan, New York.
Në komentin e parë publik, Netanyahu shkroi në platformën X se “marrëdhënia e pazakontë dhe e ngushtë e Epsteinit me Ehud Barakun nuk sugjeron se Epsteini ka punuar për Izraelin, ajo provon të kundërtën”. Ai akuzoi Barakun se, i mbërthyer nga humbja zgjedhore dy dekada më parë, ka tentuar në mënyrë obsesive të minojë demokracinë izraelite.
Netanyahu pretendoi se Baraku ka bashkëpunuar me të majtën radikale anti-sioniste për të rrëzuar qeverinë e zgjedhur, duke u angazhuar në aktivitete publike dhe prapa skenave, përfshirë nxitjen e protestave masive, shkaktimin e trazirave dhe ushqimin e narrativave të rreme mediatike.
Ehud Barak ka qenë kritik i zëshëm i Netanyahut dhe ka bërë thirrje të përsëritura për largimin e qeverisë. Ai shërbeu si kryeministër nga 1999 deri në 2001 dhe si ministër i Mbrojtjes nga 2009 deri në 2013. Marrëdhëniet e tij me Epstein janë të njohura prej vitesh, por nuk ka prova për paligjshmëri.