Lëndimi i ri i portierit Marc-André ter Stegen ka ndezur sërish debatet rreth portierëve të kombëtares gjermane dhe mundësisë së rikthimit të Manuel Neuer.
Pas ndeshjes së Kupës së Gjermanisë kundër Leipzig-ut, portieri 39-vjeçar i Bayern Munich-ut u pyet nëse do të kthehej në kombëtare për Botërorin 2026. Përgjigjja e tij ishte e prerë: “Jo”, duke konfirmuar se vendimi për t’u tërhequr nga përfaqësuesja verën e vitit 2024 mbetet përfundimtar.
Neuer vazhdon të luajë në nivel të lartë me Bayernin, por nuk parashikon ndryshime. Ai i ka dhënë mesazh mbështetjeje portierit Oliver Baumann të Hoffenheim-it, i cili pritet ta zëvendësojë si numër një.
“Tani ai është numri një dhe po bën punë shumë të mirë. I uroj çdo sukses”, tha Neuer, duke shprehur besimin te bashklojëtari.
Edhe pse tifozët dhe ekspertët shpresonin rikthimin e tij mes shtyllave të Gjermanisë, deklarata e Neuer-it është e qartë dhe pa hapësirë për interpretime. Kontrata e tij skadon në verë, çka mund të sjellë zhvillime të reja pas sezonit.