Neymar ka rinovuar kontratën me Santos deri në 31 dhjetor 2026, siç u konfirmua zyrtarisht nga klubi brazilian më 7 janar 2026. Kjo zgjatje vjen pas negociatave të vazhdueshme dhe pas spekulimeve të shumta mbi të ardhmen e sulmuesit 33-vjeçar, i cili u kthye në klubin e fëmijërisë një vit më parë.
Në një komunikatë të postuar në rrjetet sociale, Santos e cilëson Neymarin si "Princi i Vila Belmiro" dhe thekson se ai do të vazhdojë të shkruajë historinë e tij me klubin e quajtur "Sacro Mantello". Sulmuesi ish-lli i Barcelonës dhe PSG-së ka shprehur kënaqësinë për këtë marrëveshje. "Viti 2025 ishte special dhe impenjativ për mua – ka pasur momente gëzimi dhe pengesa që munda t’i përballoja vetëm falë dashurisë suaj. Viti 2026 erdhi dhe fati nuk mund të ishte ndryshe. Vendi im është këtu. Te Santos jam në shtëpinë time, i sigurt dhe i lumtur dhe bashkë me ju dua të realizoj ëndrrat e mia", deklaroi Neymar, i cili do të festojë 34-vjetorin më 5 shkurt.
Aktualisht, Neymar ndodhet në rikuperim pas një ndërhyrjeje kirurgjikale në gjurin e majtë dhe synon të kthehet në fushë nga mesi i muajit shkurt. Ai nuk ka luajtur për përfaqësuesen braziliane që nga viti 2023, për shkak të lëndimeve dhe formës së dobët, por vazhdon të shpresojë për një vend në Kupën e Botës 2026. Në pesë ndeshjet e fundit të kampionatit brazilian, ai shënoi pesë gola, duke qenë vendimtar për mbajtjen e Santos në elitën e futbollit brazilian.