Shqipëria ka regjistruar një ngadalësim të ritmit të rritjes turistike gjatë muajit qershor 2026. Sipas shifrave të prezantuara nga Ministri i Turizmit, Kulturës dhe Sportit, Blendi Gonxhja, numri i vizitorëve të huaj në qershor ishte 1,346,279, duke shënuar një rritje prej vetëm 1.28% krahasuar me qershorin e vitit 2025. Ky tregues është ndjeshëm më i ulët se trendi i periudhës janar-maj, ku rritja mesatare ishte 8.2%.
Sipas vlerësimeve të Ministrisë, klima e tensionit, protestat dhe perceptimi i pasigurisë janë faktorët që kanë ndikuar drejtpërdrejt në anulimin e vizitave nga tregjet kryesore. Në qershor, pesë shtete kryesore dërguese kanë regjistruar rënie të numrit të vizitorëve:
- Kosova: 51,190 vizitorë më pak
- Maqedonia e Veriut: 15,223 vizitorë më pak
- Gjermania: 13,165 vizitorë më pak
- Turqia: 11,062 vizitorë më pak
- Mali i Zi: 6,212 vizitorë më pak
Këto pesë tregje së bashku kanë sjellë një rënie prej 96,852 vizitorësh, ose 13% krahasuar me të njëjtën periudhë të vitit të kaluar. Për gjashtëmujorin e parë të vitit 2026, Shqipëria ka pritur gjithsej 5,059,069 vizitorë të huaj, që përfaqëson një rritje totale prej 6.25% krahasuar me gjysmën e parë të vitit 2025. Pavarësisht shifrave pozitive në total për këtë periudhë, Ministri Gonxhja theksoi se të dhënat e qershorit shënojnë një ngadalësim të dinamikës së rritjes me rreth 24%.