Ish-presidenti i Venezuelës, Nikolas Maduro, dhe bashkëshortja e tij, Silia Flores, pritet të dalin sot para një gjykate federale në Nju Jork, në orën 17:00. Në seancën e sotme, mbrojtja dhe prokuroria do të diskutojnë provat dhe ecurinë e çështjes, si dhe do të caktohet data për fillimin e gjyqit.
Avokatët e Maduros pretendojnë se administrata e Donald Trump pengon mbulimin e shpenzimeve ligjore nga Venezuela dhe cenon të drejtat e tij kushtetuese. Ata kërkojnë nga gjykata ose rrëzimin e akuzave, ose një shqyrtim të plotë të provave.
Prokurorët, nga ana tjetër, kërkojnë kufizimin e shpërndarjes së provave tek persona të tjerë, përfshirë djalin e Maduros dhe një ministër në detyrë. Sipas tyre, ekziston rreziku që dëshmitarët të dëmtohen dhe provat të zhduken.
Sipas akuzës, Nikolas Maduro, Silia Flores, djali i tyre dhe bashkëpunëtorë të tjerë kanë marrë pjesë në një rrjet trafiku kokaine që nga viti 1999, në bashkëpunim me grupe të shpallura terroriste nga SHBA. Ata akuzohen po ashtu për trafik droge drejt SHBA-së dhe përdorim armësh të paligjshme për realizimin e aktivitetit kriminal.
Autoritetet amerikane thonë se para se të bëhej president, Maduro kishte ndihmuar trafikantët e drogës me dokumente dhe mbështetje logjistike, ndërsa pas marrjes së pushtetit në vitin 2013 lejoi zhvillimin e trafikut në favor të tij dhe rrethit të tij.
Nikolas Maduro dhe Silia Flores i kanë mohuar të gjitha akuzat dhe janë deklaruar të pafajshëm.