Genc Nimanbegu, kryetar i Komunës së Ulqinit dhe lider i partisë Forca, në një intervistë për RTK Live foli për turizmin vendor dhe zhvillimet politike në Mal të Zi.
Turizmi në Ulqin
Ai theksoi se numri më i madh i turistëve vjen nga rajoni, veçanërisht nga Kosova, përfshirë diasporën nga Zvicra dhe Gjermania. Një numër i konsiderueshëm mysafirësh vjen gjithashtu nga Serbia dhe Bosnja e Hercegovinë. Këto tre grupe përbëjnë rreth 60% të qarkullimit turistik të Ulqinit.
Ndryshimet në ligjet e sigurisë
Në Kuvendin e Malit të Zi u miratuan ndryshimet në Ligjin për Ministrinë e Punëve të Brendshme (MPB) dhe Ligjin për Agjencinë e Sigurisë Kombëtare (ASK). Për këto ndryshime votuan 47 deputetë të shumicës parlamentare, përfshirë 9 deputetë nga partitë e pakicave boshnjake dhe shqiptare. Miratimi shkaktoi reagime të forta politike, sidomos pas paralajmërimit të Bashkimit Evropian se disa zgjidhje nuk përputhen me rregulloren evropiane.
Koalicioni Aleanca Shqiptare, i përbërë nga Forca, Lidhja Demokratike dhe grupi qytetar Lëvizja Tuzi, mbështeti ndryshimet vetëm pjesërisht. Aleanca votoi për ligjin e MPB-së, por jo për atë të ASK-së. Nimanbegu shpjegoi se mbështetja për ligjin e policisë synon përmirësimin e funksionimit të këtij institucioni.
Ai pranoi se paketa ligjore është politikisht dhe juridikisht e ndjeshme. “Personalisht mendoj se ligji është problematik, veçanërisht pasi kemi marrë njoftim nga Bashkimi Evropian se nuk është plotësisht në përputhje me direktivat evropiane”, tha Nimanbegu. Ai shtoi se vendimet e tilla janë të vështira dhe kërkojnë përgjegjësi për votimin dhe pasojat. Përgjegjësia politike, sipas tij, i takon kryesisht shumicës parlamentare.