Sot, më 23 shkurt 2026, besimtarët ortodoksë shqiptarë nisin Kreshmën e Madhe të Pashkës, e cila zgjat deri më 12 prill, në kremtimin e Ngjalljes së Krishtit, sipas njoftimit të Kishës Ortodokse Autoqefale e Shqipërisë.
Kreshma ka karakter pendimi të thellë dhe shërben si periudhë parapërgatitore për kremtimin e Pashkës. Përpara kësaj përpjekjeje shpirtërore, vetë Krishti vendosi si parakusht ndjesën (faljen) ndaj tjetrit: «Sepse nëse ju, ua falni njerëzve fajet e tyre, Ati juaj qiellor do t’ju falë juve; por nëse ju nuk ua falni njerëzve fajet e tyre, as Ati juaj qiellor nuk do t’ju falë juve fajet tuaja» (Mateu 6:14-18).
Kreshma është bashkëpunim i shpirtërores dhe trupores në adhurimin e Perëndisë. Duke agjëruar nga disa ushqime dhe duke u penduar nga mëkatet, njeriu i tëri – trup e shpirt – afrohet te Zoti.
Rregullat e ushqimeve
Ushqimet e ndaluara
- Çdo ushqim me bazë shtazore, përfshirë mishin dhe produktet e tij.
- Peshku, përveç më 25 mars (kremtja e Ungjillëzimit të Hyjlindëses Mari) dhe 5 prill (Diela e Dafinave).
- Produkte bulmeti: djathë, gjalpë, kos, qumësht, vezë.
- Alkooli, duhani dhe zakonet e dëmshme.
Ushqimet e lejuara
- Perime dhe zarzavate: fasule, thjerrëza, oriz, patate, domate, qepë, karrota, patëllxhanë, bizele, ullinj, lakër, lulelakër, tranguj, kungull, spec, bamje, panxhar, rrepa, grurë, misër, qiqra, hudhër, kërpudha, spinaq, brokoli, sallatë jeshile, rukola dhe turshitë e tyre.
- Fruta të thata: arra, bajame, lajthi, kikirikë, fara, susam, rrush i tharë, fik i thatë.
- Brumëra: makarona pa vezë, byrek me perime.