Ky artikull është përditësuar. Shiko përditësimet
Kanë nisur reshje bore në zonat e larta malore të qarkut të Kukësit. Reshjet u regjistruan fillimisht në zonën e Shishtavecit dhe Valbonës.
Borë ka rënë në segmentin Ura e Kollovozit-Shishtavec të rrugës nacionale Kukës-Shishtavec, si dhe në aksin Bajram Curri-Valbonë. Aktualisht, nuk raportohen probleme në qarkullimin e mjeteve, pasi kompanitë përgjegjëse për mirëmbajtjen e rrugëve janë në terren dhe po kryejnë pastrimin e borës dhe trajtimin e saj me kripë.
I gjithë qarku i Kukësit furnizohet me energji elektrike, përveç disa fshatrave:
• Në njësinë administrative Bytyç: Kam, Lajthiz, Haxhibegaj, Zogaj dhe Xhuxhë;
• Në njësinë administrative Llugaj: Llugaj dhe Pac;
• Në njësinë administrative Margegaj, bashkia Tropojë: Çerem.
Ndërkohë, zonat e ulëta të Kukësit vazhdojnë të preken nga reshjet e shiut. Këto reshje kanë bërë që rrugët nacionale dhe bashkiake të jenë problematike për shkak të rënies së gurëve, inerteve dhe dherave, si dhe bllokimeve të tombinove në disa segmente.
Përditësim
Furnizimi me energji elektrike është rikthyer pothuajse në të gjithë zonat e qarkut të Kukësit, përveç fshatrave të prekur nga reshjet e borës.
Rrëshqitje toke dhe rënie gurësh kanë bllokuar segmente rrugësh, duke vështirësuar qarkullimin. Punonjësit e emergjencave dhe autoritetet lokale po punojnë në terren për pastrimin e tyre.
Banorët duhet të tregojnë kujdes dhe të shmangin zonat e rrezikuara.