Mbrëmjen e së dielës, në Majac të Podujevës, një djalë ka mbetur i vdekur dhe dy gra janë plagosur.
Kryeprokurori i Prokurorisë Themelore në Prishtinë, Zejnullah Gashi, konfirmoi rastin për mediumin “Betimi për Drejtësi”. Ai tha se njëra prej të plagosurve është 70-vjeçare, ndërsa e plagosura tjetër dyshohet se ka kryer vrasjen dhe më pas ka tentuar vetëvrasje.
Sipas IndeksOnline, e dyshuara quhet Ardita Gashi, rreth 30-vjeçare, e cila është gjetur e plagosur në kokë pas ndërhyrjes së policisë. Ajo dyshohet të ketë pasur kontakte me viktimën.
Gazeta Express dhe Epoka e Re raportojnë se, sipas informacioneve të pakonfirmuara, viktima ka qenë i dashuri i të dyshuarës.
Zejnullah Gashi tha se prokurorja e rastit po shkon në vendngjarje për zbardhjen e plotë të rrethanave.
Përditësime
M.G., 73-vjeçare, një nga gratë e plagosura në Majac të Podujevës, ka vdekur në QKUK në orën 03:00, konfirmoi zëdhënësja Mirlinda Qyalla.
Zhvillime të reja:
- Viktima mashkull është identifikuar si Ilaz Brahimi, 42-vjeçar, i ftuar në shtëpi nga dyshuarja Ardita Gashi, 31-vjeçare, dhe i qëlluar disa herë me armë.
- Ardita Gashi u mbyll në shtëpi, kërcënoi të tjerët para se të vetëplagosej.
- M.G. kishte lidhje familjare me dyshuaren.