Gjykata Themelore në Gjilan ka miratuar kërkesën e Prokurorisë Themelore të Gjilanit për caktimin e masës së paraburgimit prej një muaji ndaj të pandehurit Valon Ramushi. Ai dyshohet për veprat penale vrasje e rëndë dhe mbajtje, kontroll ose posedim të paautorizuar të armëve, pas ngjarjes tragjike të ndodhur më 9 tetor 2026, rreth orës 14:21, në rrugën Jozef Bayden II në fshatin Livoç i Ultë.
Sipas njoftimit të gjykatës, motivi i ngjarjes mbetet ende i panjohur. Pas një mosmarrëveshjeje, i pandehuri kishte udhëtuar me bashkëshorten, të ndjerën Nafije B., në fshatin Pozheran të Komunës së Vitisë, për t'u kthyer më pas në drejtim të Gjilanit. Gjatë kësaj kohe, viktima Egzon B., së bashku me dy persona të tjerë, M. B. dhe R. B., po e ndiqnin të pandehurin me një veturë Opel Combo (targa 239-HM) për të biseduar me të. Në hyrje të fshatit Livoç i Ultë, i pandehuri, i cili drejtonte një veturë Volkswagen Tiguan (targa 06-767-HK), dyshohet se qëlloi me armë zjarri të llojit Beretta (nr. serik PX321722) në drejtim të bashkëshortes, duke e privuar nga jeta përderisa ajo ishte në ulësen e pasagjerit.
I pandehuri ndaloi automjetin në hyrje të fshatit, ku u është drejtuar familjarëve të bashkëshortes me fjalët: “Unë jetën e humba se gruan e vrava, edhe juve kam me ju vra”. Ai ka shtënë në drejtim të tyre, duke vrarë Egzon B. dhe plagosur rëndë M. B., ndërsa R. B. ka arritur të largohet. Pas kryerjes së veprave, i pandehuri e ka dërguar trupin e bashkëshortes në oborrin e Spitalit Rajonal të Gjilanit dhe më pas është vetëdorëzuar në polici.
Gjatë kontrolleve të mëvonshme, policia ka sekuestruar armë shtesë në posedim të të pandehurit, përfshirë një armë të gjatë të tipit Mossberg. Gjyqtari i procedurës paraprake ka vlerësuar se ekzistojnë arsyet ligjore për paraburgim, pasi masat e tjera alternative do të ishin të pamjaftueshme për zhvillimin e procedurës penale. Ndaj këtij vendimi, palët kanë të drejtë ankese në Gjykatën e Apelit të Kosovës.
Përditësime
Gjatë kontrollit, policia sekuestroi armë shtesë në posedim të Valon Ramushit, përfshirë një armë të gjatë të tipit Mossberg.