Në Qendrën e Numërimit dhe Rezultateve po vijon procesi i numërimit të fletëvotimeve të ardhura nga diaspora. Sipas të dhënave të fundit, kur janë procesuar rreth 70 për qind e votave nga ambasadat dhe konsullatat, ndryshimet në shpërndarjen e mandateve parlamentare janë bërë më të qarta.
Sipas të dhënave të publikuara, Lëvizja Vetëvendosje ka arritur në kuotën e 50 mandateve në Kuvend, me një mbështetje prej 43.62 për qind të votave, përkatësisht 299,526 vota.
Partitë e tjera parlamentare renditen si më poshtë:
• Partia Demokratike e Kosovës (PDK): 23 mandate, me 143,770 vota ose 20.94 për qind.
• Lidhja Demokratike e Kosovës (LDK): 19 mandate, me 117,361 vota ose 17.09 për qind.
• Aleanca për Ardhmërinë e Kosovës (AAK): 8 mandate, me 49,123 vota ose 7.15 për qind.
Procesi i numërimit në përfaqësitë diplomatike është drejt fundit, ku deri tani janë procesuar 32 nga 47 vendvotimet e planifikuara. Autoritetet zgjedhore bëjnë me dije se rezultatet janë paraprake dhe mund të pësojnë ndryshime të vogla deri në përmbylljen e plotë të numërimit të të gjitha fletëvotimeve të ardhura me postë dhe nga ambasadat.
Përditësime
Lëvizja Vetëvendosje (LVV) ka thelluar epërsinë në 44.09%, pasi janë numëruar mbi 310,000 vota. Deri më tani janë procesuar 2,497 nga 2,691 vendvotime, përkatësisht 92.79% e tyre. Zhvillimet kryesore përfshijnë:
• Komisioni Qendror i Zgjedhjeve (KQZ) ka përfunduar numërimin e 46 nga 47 vendvotimeve në përfaqësitë diplomatike.
• Ka filluar procesimi i votave me postë, me një kuti të numëruar deri në këtë fazë.
• Të dhënat e fundit ofrojnë një pasqyrë më të qartë mbi mbështetjen e subjekteve politike nga diaspora, me LVV-në që aktualisht pritet të sigurojë 50 mandate.