Organizata e Kombeve të Bashkuara (OKB) u bëri thirrje shteteve të ndërmarrin masa urgjente për t’u përgatitur për pasojat e El Ninjos, i cili, sipas paralajmërimit të saj, po merr përmasa të papara. Fenomeni pritet të arrijë kulmin në dhjetor, ndërsa pasojat e temperaturave ekstreme, përmbytjeve dhe thatësirave mund të vazhdojnë deri në vitin 2027 dhe më tej. OKB-ja kërkoi masa parandaluese për të mbrojtur miliona njerëz të ekspozuar ndaj rreziqeve.
Celeste Saulo, drejtuesja e Organizatës Botërore Meteorologjike (OBM), tha se fuqia e fenomenit mund të jetë e paprecedentë dhe të tejkalojë kufijtë e grafikëve të monitorimit të përdorur gjatë katër dekadave të fundit. Në një konferencë për media në Gjenevë, ajo tha se ngjarjet ekstreme të motit pritet të shtohen dhe të shkaktojnë pasoja zinxhirore ndërsa El Ninjo intensifikohet. Saulo dhe shefi i ndihmave të OKB-së, Tom Fletcher, kërkuan veprim urgjent dhe të koordinuar paraprakisht për të mbrojtur komunitetet më të cenueshme. “Ne nuk mund ta ndalim El Ninjon, por mund të parandalojmë shumë nga pasojat e tij më të rënda për njerëzit”, tha Saulo.
Fletcher tha se ndikimet mund të prekin Amerikën Latine, Afrikën Lindore dhe Jugore, Azinë dhe rajonin e Paqësorit. Sipas tij, pasojat mund të ndihen për muaj dhe, potencialisht, për vite, në një kohë kur krizat mbivendosen. Ai përmendi konfliktet, zhvendosjet e popullsisë, rritjen e çmimeve të karburanteve, plehrave kimike dhe ushqimeve, si dhe shkurtimet e ndihmave. Fletcher paralajmëroi se dhjetëra miliona njerëz mund të kenë nevojë për ndihmë humanitare, ndërsa 50 milionë mund të përballen me uri. Ai tha se dy javët e ardhshme janë kritike për veprim.
Fletcher paralajmëroi gjithashtu për goditje ekonomike globale dhe rrezik të shtuar për konflikte, zhvendosje dhe migrim. Ai u kërkoi vendeve, bankave për zhvillim dhe institucioneve financiare ndërkombëtare të vënë fonde në dispozicion përpara se të ndodhin dëmet. Sipas tij, janë vënë në dispozicion 50 milionë dollarë për të ndihmuar 11 vende të rrezikuara drejtpërdrejt, përfshirë Çadin, El Salvadorin, Etiopinë, Somalinë dhe Sudanin e Jugut.
El Ninjo ngroh sipërfaqen e ujit në pjesën qendrore dhe lindore të Oqeanit Paqësor pranë ekuatorit, duke ndikuar në erërat, presionin atmosferik dhe modelet e reshjeve. Zakonisht ndodh çdo dy deri në shtatë vjet dhe zgjat rreth nëntë deri në 12 muaj. Kushtet luhaten mes El Ninjos dhe La Ninjas, me periudha neutrale ndërmjet tyre. Fenomeni pritet të rrisë temperaturat në pjesën më të madhe të planetit dhe të shtojë ndikimet e ndryshimeve klimatike të shkaktuara nga veprimtaria njerëzore.
Parashikimi i fundit i OKB-së thotë se temperaturat e sipërfaqes së detit në Paqësorin tropikal, epiqendra e El Ninjos, mund të rriten deri në 3,8 gradë Celsius mbi mesataren gjatë periudhës nëntor-janar. Sipas burimeve, këto vlera janë shumë më të larta se ato që shkakton zakonisht fenomeni. El Ninjo zakonisht arrin kulmin ndërmjet nëntorit dhe shkurtit, ndërsa rritja e temperaturave si pasojë e tij ndodh zakonisht më vonë.