Një koment i bërë gjatë një aktiviteti rinor në Kuvendin e Kosovës i ka kushtuar me përjashtim nga aktivitetet e rrjetit rinor Olsa Sadikut, përfaqësuese e të rinjve nga Obiliqi. Ngjarja ndodhi më 12 gusht, në Ditën e Rinisë, kur Sadiku ndodhej në ndërtesën e Kuvendit. Gjatë kësaj kohe, në sallë filloi një seancë e thirrur nga Partia Demokratike e Kosovës (PDK), e cila u shoqërua me përplasje verbale mes deputetëve të PDK-së dhe atyre të Lëvizjes Vetëvendosje.
Në ato momente, Sadiku shprehu mendimin e saj për situatën politike duke thënë: “Po de që dy vjet s’kemi qeveri, pse me e lanë?”. Sipas saj, kjo deklaratë, e cila u bë virale, u bë shkak për ndërprerjen e bashkëpunimit me Kuvendin e të Rinjve të Kosovës (KRK), duke i pamundësuar pjesëmarrjen në aktivitetet e mëtejshme dhe përfshirjen në procesin e themelimit të Kuvendit të të Rinjve në komunën e Obiliqit.
Sadiku ka theksuar se nuk përfaqëson asnjë subjekt politik dhe se deklarata e saj ishte spontane. Në një reagim të saj, ajo ka sqaruar se në vendimin për ndërprerjen e bashkëpunimit nuk është përmendur asnjë shkelje statutore apo disiplinore. Ajo ka ngritur pikëpyetje mbi parimin e apolitizmit institucional, duke argumentuar se organizatat mund të jenë apolitike, por kjo nuk duhet të nënkuptojë heshtjen politike të individit.
“Nëse ne të rinjtë ishim aty në një aktivitet rinor dhe u gjendëm në mes të një situate të krijuar nga një zhvillim politik brenda Kuvendit, a nuk shtrohet edhe pyetja nëse u përdorëm edhe ne në një mënyrë politike?”, ka shkruar ajo. Sadiku ka deklaruar se do të vijojë angazhimin e saj për të rinjtë e Obiliqit, duke shprehur qëndrimin se pjesëmarrja rinore në jetën publike nuk duhet të kushtëzohet me heshtje.