Partizani do të përballet nesër me Bylisin në kuadër të javës së 23-të të Superligës shqiptare të futbollit. Ndeshja luhet në stadiumin Adush Muça të Ballshit, në orën 13:30. Klubi festoi dje 80-vjetorin e themelimit të seksionit të futbollit dhe të shumsportshit.
Në konferencën për shtyp para sfidës, trajneri Oltijon Kërnaja uroi familjen e kuqe për përvjetorin dhe vlerësoi gjendjen e ekipit. "Ekipi është në gjendje të mirë. Pas ndeshjes së mirë ndaj Elbasanit po rikuperojmë energjitë e akumuluara nga vrapimet e shumta, por jemi në formë për ndeshjen e radhës", tha ai.
Sa i përket Bylisit, Kërnaja e cilësoi ekip të fortë, cilësor dhe agresiv, veçanërisht në fushën e tyre. "Kemi ndjekur dy ndeshjet e fundit të tyre: me Dinamo City në Air Albania dhe në Adush Muça. Është kundërshtar për t'u vlerësuar. Ne do hyjmë në fushë vetëm për të marrë tre pikë, të cilat na duhen më shumë se çdo herë. Pas ndeshjeve të mira ka ardhur koha për pikët."
I pyetur për deklaratën e mëparshme, kur premtoi 9 pikë para ndeshjes me Bylisin, trajneri sqaroi se atëherë kishte qenë momenti për motivim. "Tashmë çdo ndeshje vlerësohet maksimalisht. Nuk mendojmë për tre ndeshjet e tjera, sepse 10 ditët janë të ngarkuara me kampionat dhe kupë. Fokusi është te ndeshja nesër në Ballsh."
Në ndeshjen e parë në Ballsh, Partizani humbi 3-1, por Kërnaja theksoi se situata ka qenë krejtësisht tjetër. Gjithashtu, paniku për mbrojtësin Saliu Sembene ka kaluar; analizat treguan luhatje tensioni te lojtari 24-vjeçar.