Një operacion i gjerë po zhvillohet në Parkun Kombëtar të Lurës për neutralizimin e vatrave të zjarrit që kanë përfshirë prej dy ditësh sipërfaqe të konsiderueshme pyjesh me pisha dhe bredh, si dhe kullota. Situata është rënduar nga kushtet e vështira atmosferike, temperaturat ekstreme dhe terreni i thyer, i cili pengon qasjen e mjeteve tokësore.
Në aksionin e shpëtimit po marrin pjesë ekipe të Shërbimit Zjarrfikës, Policisë së Shtetit, Emergjencave Civile dhe 40 ushtarë të Batalionit të Mbështetjes, të cilët iu bashkuan operacionit ditën e sotme. Përpjekjet mbështeten edhe nga ndërhyrje të përsëritura nga ajri me helikopterë, ndërsa zjarri ka avancuar drejt zonës së Gjagjishtit dhe pllajave të Lanë Lurës. Gjatë ditës së djeshme, në operacion u angazhuan rreth 100 forca të bashkisë, emergjencave, zjarrfikësve dhe vullnetarëve.
Ministri i Punëve të Brendshme, Besfort Lamallari, theksoi se angazhimi do të vijojë pa ndërprerje deri në shuarjen e plotë të të gjitha vatrave. Krahas angazhimit operativ, ministri bëri thirrje publike për një reagim të ashpër ligjor ndaj çdo rasti të zjarrvënies së qëllimshme. Lamallari u kërkoi Policisë së Shtetit identifikimin e plotë të autorëve dhe Prokurorisë ndjekjen penale të tyre, duke theksuar se shkatërrimi i pasurisë kombëtare duhet të ndëshkohet sipas ligjit penal me seriozitetin më të lartë profesional.