Policia spanjolle finalizoi një operacion të gjerë në rajonin e Katalonjës, duke çmontuar një organizatë kriminale të specializuar në trafikimin e armëve. Aksioni, i cili u zhvillua pas një hetimi të nisur në janar të vitit 2026, përfshiu 130 efektivë të forcave Mossos d’Esquadra dhe Policia Nacional.
Gjatë kontrollit në dy depo të grupit, policia gjeti dhe sekuestroi një arsenal që përbëhej nga:
• 1 bazukë (lëshues raketash)
• 1 armë lufte
• 38 pistoleta gjysmëautomatike
• 4 pushkë
• 2 revolverë
• 1 granatë dore
• 1 000 fishekë
• Pajisje mbrojtëse (jelekë antiplumb dhe mburoja balistike)
• 12 000 euro
Hetimet zbuluan se organizata operonte nën drejtimin e një personi që ndodhej në burg. I dyshuari përdorte komunikimin me botën e jashtme për të dhënë urdhra anëtarëve të familjes, të cilët realizonin blerjen, magazinimin dhe shitjen e armëve. Njëra prej vajzave të drejtuesit ishte përgjegjëse për reklamimin e arsenalit përmes fotografive dhe videove të dërguara klientëve, ndërsa bashkëshortja e tij kryente transportin e armëve drejt destinacioneve të dakordësuara.
Në total, janë arrestuar nëntë shtetas, pesë burra dhe katër gra, të moshës nga 20 deri në 48 vjeç. Paralelisht me arrestimet në terren, autoritetet kanë ushtruar kontroll edhe në ambientet e burgut ku mbahej kreu i grupit. Hetimet mbeten të hapura dhe policia nuk përjashton mundësinë e arrestimeve të mëtejshme.