Kryeministri Albin Kurti pritet të dërgojë ftesa për takime me partitë opozitare gjatë kësaj jave, për arritjen e një marrëveshjeje për zgjedhjen e presidentit të ri të Kosovës. Ftesat kanë mbetur të ngrira, pasi PDK, LDK dhe AAK refuzojnë takime në rrethanat aktuale, derisa Gjykata Kushtetuese po shqyrton dekretin e presidentes për shpërndarjen e Kuvendit.
Gjykata Kushtetuese ka vendosur masë të përkohshme për pezullimin e procesit të zgjedhjes së presidentit dhe çdo veprimi të mëtejshëm të Kuvendit në këtë drejtim, deri më 31 mars. PDK ka deklaruar se është e domosdoshme të pritet vendimi përfundimtar i Gjykatës.
Deputeti i PDK-së, Artan Behrami, e ka quajtur ftesën e Kurtit jo serioze. "Ftesa është tepër jo serioze sepse kryeministri Kurti ka pasur muaj kohë për të thirrur të gjitha partitë politike dhe për të gjetur një konsensus për emrin e presidentit. Tani ai nuk mund ta kompensojë këtë kohë në sekondat e fundit dhe duhet të respektojë edhe vendimin e Gjykatës Kushtetuese. Vetëm pas një vendimi të Gjykatës Kushtetuese mund të ketë takime, nëse ajo e lejon. Ne besojmë se vendi duhet të shkojë në zgjedhje, pasi Kuvendi ka dështuar të zgjedhë presidentin", u shpreh Behrami.
Ai akuzoi LVV-në për presion mbi Gjykatën Kushtetuese, demonizim të gjyqtarëve dhe mospranim të vendimeve të saj. Deputetja e AAK-së, Albana Bytyqi, e sheh ftesën si lojë të Kurtit për të çorientuar konfliktin me presidenten Osmani dhe e fajëson kryeministrin për dështimin në zgjedhjen e presidentit brenda afatit kushtetues.
Kryetari i LDK-së deklaroi se është i gatshëm ta takojë Kurtin një orë pas verdiktit të Gjykatës Kushtetuese, por jo më herët, duke theksuar se çështja e zgjedhjes së presidentit ndodhet tashmë në shqyrtim të Gjykatës.