Një ortek i fuqishëm që goditi malin Broad Peak në Pakistan ka shkaktuar vdekjen e katër alpinistëve, ndërsa gjashtë të tjerë mbeten ende të zhdukur. Ngjarja ndodhi të enjten në vargmalin Karakoram, kur një ekspeditë ndërkombëtare po lëvizte nga Kampi 2 drejt Kampit 3 me synimin për të arritur majën prej 8.051 metrash.
Sipas Klubit Alpin të Pakistanit, ekipet e shpëtimit në terren kanë gjetur deri më tani katër trupa, të cilët janë identifikuar si:
- Nadhira Ahmed Abdullah Al Harthy nga Omani
- Sohail Sakhi nga Pakistani
- Wang Zhong nga Kina
- Mallory Geis nga SHBA-ja
Ekipi prej 10 alpinistësh udhëhiqej nga alpinisti i mirënjohur Nirmal Purja, i njohur si “Nims Dai”. Pjesë e grupit janë edhe pesë alpinistë të tjerë nga Nepali: Pur Bahadur Gurung “Yukta”, Kili Pemba Sherpa “Kilu”, Nima Sherpa, Nawang Thindu Sherpa dhe Gyalu Sherpa.
Kryetari i Klubit Alpin të Pakistanit, Irfan Arshad, ka njoftuar se po bëhen përpjekje intensive për shpëtim, përfshirë përdorimin e helikopterëve dhe ekipeve tokësore. Operacioni është vështirësuar ndjeshëm nga kushtet e rënda atmosferike në zonë. Sipas të dhënave të para nga pajisjet gjurmuese, alpinistët ndaluan ngjitjen rreth orës 09:30 të mëngjesit të së enjtes dhe u zhvendosën disa qindra metra nga vendndodhja e tyre fillestare pas goditjes nga orteku. Ekipet e shpëtimit mbeten në pritje të përmirësimit të motit për të vijuar kërkimet për të mbijetuarit e mundshëm.
Përditësime
Autoritetet në Gilgit-Baltistan kanë lokalizuar vendndodhjen e tragjedisë në Broad Peak, në lartësinë 6.600 metrash. Ekipet e kërkim-shpëtimit kanë nisur operacionin për rikuperimin e katër trupave të gjetur në zonën e ortekut. Kompania Seven Summit Treks konfirmoi se në grupin e ekspeditës ishin përfshirë tre udhërrëfyes sherpa, ndërsa Ministria e Jashtme e Kinës po asiston në verifikimin e identiteteve dhe mbështetjen logjistike për ekipet në terren.
Autoritetet konfirmuan sot se alpinisti Nirmal Purja bën pjesë në grupin prej 10 personash të zhdukur pas ortekut në Broad Peak. Ministria e Jashtme e Nepalit raportoi se 6 prej të humburve janë shtetas nepalezë. Operacionet e kërkim-shpëtimit janë intensifikuar me mbështetjen e dy helikopterëve të ushtrisë pakistaneze.
Autoritetet kanë konfirmuar se alpinisti Nirmal Purja është 43 vjeç, ndërkohë që vijon procesi i identifikimit të grupit të përfshirë në tragjedinë e Broad Peak.
Autoritetet kanë përditësuar bilancin e tragjedisë në Broad Peak, duke konfirmuar 3 viktima dhe 7 persona të zhdukur. Viktima e tretë është identifikuar si shtetasi nepalez Pur Bahadur Gurung. Ekipet e shpëtimit, të mbështetura nga alpinistë të ekspeditave fqinje në K2 që ndërprenë ngjitjen, po përdorin dronë të specializuar që kanë pikasur shenja të mundshme në zonën e ortekut. Ndërkohë, është konfirmuar se alpinisti Nirmal Purja është ish-pjesëtar i njësisë elitare Special Boat Service të Marinës Mbretërore Britanike.