Presidentja e Republikës së Kosovës, Vjosa Osmani, pranoi sot letrat kredenciale të ambasadores së re të Republikës së Kosta Rikës në Republikën e Kosovës, Olga M. Sauma Uribe.
Me këtë rast, Osmani i uroi mirëseardhje ambasadores dhe e përgëzoi për emërimin. Ajo shprehu bindjen se mandati i ambasadores do të kontribuojë në thellimin e marrëdhënieve të shkëlqyera ndërmjet dy vendeve.
Presidentja shprehu mirënjohje për mbështetjen e hershme dhe parimore të Kosta Rikës për pavarësinë dhe sovranitetin e Republikës së Kosovës. Ajo theksoi potencialin për zgjerimin e bashkëpunimit dypalësh dhe vuri në pah vlerësimin e lartë të Kosovës për marrëdhëniet miqësore me shtetet e Amerikës Latine. Kosova mbetet e përkushtuar për forcimin e bashkëpunimit me vendet e këtij rajoni në fusha me interes të ndërsjellë.
Gjatë takimit u diskutua për mundësitë e thellimit të bashkëpunimit në diplomaci, ekonomi dhe veçanërisht në turizëm. Osmani nënvizoi rëndësinë e intensifikimit të bashkëpunimit për heqjen e ndërsjellë të vizave ndërmjet dy vendeve. Kjo shihet si hap konkret drejt forcimit të bashkëpunimit midis qytetarëve, bizneseve dhe marrëdhënieve dypalëshe.
Në përmbyllje, presidentja riafirmoi përkushtimin e Republikës së Kosovës për paqe dhe bashkëpunim ndërkombëtar. Ajo theksoi rëndësinë e partneritetit me Kosta Rikën dhe shtetet e tjera të Amerikës Latine në avancimin e prioriteteve të përbashkëta për paqe, demokraci dhe zhvillim.