Presidentja e Republikës së Kosovës, Vjosa Osmani, në një intervistë për podkastin Nerv, ka shpjeguar arsyet pse nuk ka vendosur lule në vende ku UÇK-ja quhet organizatë terroriste. Ajo ka theksuar se nuk bën nderime aty ku njolloset lufta çlirimtare e Kosovës.
Osmani ka deklaruar se nuk pranon nga askush krijimin e një ekuivalence morale mes krimeve të kryera nga Serbia dhe regjimi i Slobodan Millosheviçit kundër civilëve të pafajshëm në Kosovë, dhe atyre që mund të kenë ndodhur në raste individuale. "Si presidente e Republikës, e them me krenari që unë asnjë moment nuk e pranoj nga askush në këtë botë që të krijojë ekuivalencë morale dhe barazi mes asaj se çfarë ka bërë Serbia dhe regjimi i Millosheviçit kundër njerëzve të pafajshëm në Kosovë, dhe çfarë mund të ketë ndodhur në një rast individual", ka thënë ajo.
Presidentja ka riafirmuar qëndrimin e saj të njohur për luftën çlirimtare. "Besoj fuqishëm në luftën e drejtë që e ka bërë UÇK-ja dhe këtë do ta mbroj deri në fund", ka shtuar Osmani, duke theksuar se do ta mbrojë pastërtinë e kësaj lufte në çdo kohë.
Një nga arritjet më të mëdha gjatë mandatit të saj, sipas Osmanit, ka qenë rikonfirmimi i njohjeve të Kosovës nga shtetet për të cilat Serbia pretendonte se e kishin çnjohur vendin. Ky proces ka kërkuar angazhim të madh institucional dhe diplomatik nga Presidenca e Kosovës.