Vjosa Osmani, presidente e Kosovës, në një lidhje direkte nga Davosi në emisionin Top Story me Grida Dumën, ndau detajet nga ceremonia e Bordit të Paqes, ku nënshkroi për Kosovën pranë Donald Trump dhe udhëheqësve të tjerë.
Biseda me Trump
E pyetur për bisedën me presidentin amerikan Donald Trump, Osmani u shpreh se ajo ishte shumë pozitive për Kosovën dhe qytetarët e saj. Biseda kishte filluar në samitin e OKB-së në Nju Jork më 28 shtator, kur Trump i përcolli një mesazh për Kosovën.
Roli kushtetutor dhe përfaqësimi
Sa i përket përfaqësimit të Kosovës, Osmani sqaroi se Kushtetuta e Kosovës parasheh që presidentja të udhëheqë politikën e jashtme. Kryeministri Albin Kurti ishte po ashtu në Davos, por detyrat janë të ndara. Aderimi në Bordin e Paqes është fitore e përbashkët.
"Sepse kështu e parasheh Kushtetuta e Kosovës, sepse tek ne presidentja e udhëheq politikën e jashtme, edhe kryeministri është këtu në Davos, por ne i kemi detyrat e ndara. Megjithatë, sukseset i kemi të përbashkëta", tha ajo.
Protokolli dhe veshja
Për uljen pranë Trump-it, Osmani shpjegoi se rregullat e protokollit, përfshirë uljen dhe nënshkrimin, ishin të përcaktuara nga SHBA dhe Shtëpia e Bardhë. Sa i përket veshjes së kuqe, ajo e quajti ngjyrën e preferuar të saj.
Mungesa e Ramës
Sa i përket mungesës së Shqipërisë, Osmani tha se kryeministri Edi Rama ishte një ndër të parët të ftuar personalisht nga Trump-i si shtet themelues. Ajo nuk e di arsyen pse Rama nuk udhëtoi dhe sugjeroi të pyetet ai, duke falënderuar për bashkëpunimin e mëparshëm.
"Pse nuk ka arritur të udhëtojë kryeministri, besoj duhet të pyesni atë sepse orët e fundit nuk është se kemi komunikuar, por e di që ka qenë i ftuar", u shpreh ajo.