Pas publikimit të rezultateve preliminare të zgjedhjeve të parakohshme parlamentare në Kosovë, Vjosa Osmani, bartëse e listës së Lidhjes Demokratike të Kosovës (LDK), shprehu synimin për një mandat tjetër në krye të shtetit. Në një konferencë për media me kryetarin e LDK-së, Lumir Abdixhiku, ajo theksoi se Lëvizja Vetëvendosje nuk ka asnjë arsye për ta refuzuar emrin e saj për postin e Presidentes së shtatë të Republikës së Kosovës.
Sipas të dhënave preliminare, LDK-ja ka arritur të sigurojë 17.69% të votave dhe 20 mandate. Osmani e konsideroi këtë si rritjen më të madhe mes subjekteve politike pjesëmarrëse në këto zgjedhje, duke shtuar se vota e qytetarëve ka ndihmuar në ribalancimin e skenës politike të vendit.
Osmani deklaroi se nga dita e nesërme fokusi i partisë do të jetë krijimi i institucioneve funksionale dhe ofrimi i stabilitetit. Ajo pranoi se pjesëmarrja e ulët në votime reflekton lodhjen e qytetarëve nga krizat e njëpasnjëshme, por theksoi se ky rezultat shënon nisjen e një faze të re drejt ringritjes së plotë të LDK-së në muajt dhe vitet në vijim.