Organizata e Veteranëve të Luftës së UÇK-së zhvilloi një takim me ministrën për Evropën dhe Punët e Jashtme të Shqipërisë, Elisa Spiropali, më 25 shkurt 2026.
Gjatë takimit, përfaqësuesit e OVL-UÇK-së e njoftuan ministrën për angazhimet e tyre në lidhje me zhvillimet në Gjykatën Speciale në Hagë dhe për hapjen e një peticioni qytetar. Peticioni synon mobilizimin mbarëkombëtar në mbështetje të një procesi të drejtë dhe me standarde të barabarta për luftën çlirimtare.
Veteranët theksuan rëndësinë që zëri i tyre dhe i qytetarëve të dëgjohet në fazën përfundimtare të këtij procesi. Në të njëjtën kohë, shprehën mirënjohje për mbështetjen dhe angazhimin e vazhdueshëm të shtetit shqiptar në çështjet me rëndësi kombëtare.
"E falënderuam Ministrën dhe shtetin shqiptar për mbështetjen dhe angazhimin e vazhdueshëm që po japin në këtë aspekt, duke vlerësuar rolin e Shqipërisë në mbështetje të çështjeve me rëndësi kombëtare", thuhet në njoftimin e OVL-UÇK-së.