Ministrja e Mjedisit dhe Planifikimit Hapësinor, Fitore Pacolli, ka marrë vendim për të ndaluar rreptësisht çdo lloj aktiviteti ndërtimor pa leje brenda Parqeve Kombëtare Bjeshkët e Nemuna dhe Sharr në Kosovë. Ky vendim, i publikuar ditë më parë, ndalon qarkullimin e mjeteve të transportit që bartin material ndërtimor, të mjeteve të rënda pune dhe të makinerive të specializuara për ndërtim, pa autorizim të posaçëm nga Ministria e Mjedisit dhe Planifikimit Hapësinor.
Fitore Pacolli e ka shpjeguar vendimin si hapin e parë për të rikthyer ligjshmërinë dhe rendin në zonat e mbrojtura. Ajo ka theksuar se parqet kombëtare janë pasuri e përbashkët që duhet ruajtur nga secili.
Kryetari i Aleancës për Ardhmërinë e Kosovës, Ramush Haradinaj, ka reaguar duke e cilësuar vendimin si shembull të qasjes së paditur dhe të shkëputur nga realiteti. Ai ka shkruar se qeveria në largim nuk e ka njohur terrenin dhe jetën e njerëzve atje, duke goditur drejtpërdrejt familjet, fshatrat dhe ekonominë lokale.
Haradinaj ka përmendur se Rugova dhe Bjeshkët e Nemuna nuk janë vetëm zona natyrore, por përfshijnë 13 fshatra ku banorët jetojnë, ndërtojnë dhe zhvillojnë ekonominë në kushte të vështira infrastrukturore. Ai ka shtuar se në vend të investimeve në rrugë, infrastrukturë dhe zhvillim të qëndrueshëm për këtë perlë turistike, vendimi rrezikon ta izolojë zonën dhe ta mbysë çdo mundësi zhvillimi.