Paditësja tërheq zyrtarisht akuzat për përdhunim ndaj Jay-Z

Gruaja, e njohur në dokumentet gjyqësore me pseudonimin Jane Doe, ka dorëzuar një deklaratë zyrtare në Gjykatën Federale në Manhattan, ku tërheq të gjitha pretendimet për sulm seksual ndaj reperit Shawn "Jay-Z" Carter. Në deklaratën prej 11 faqesh, ajo nënvizoi se asnjë nga akuzat e bëra nuk ka qenë e vërtetë, duke shtuar se nuk e ka takuar kurrë reperin dhe se ai nuk është sjellë kurrë në mënyrë të papërshtatshme ndaj saj. Sipas deklaratës, procesi gjyqësor i nisur në tetor 2024 u nxit nga një reklamë në Facebook që kërkonte persona me pretendime për sulme seksuale ndaj Sean "Diddy" Combs. Ajo pohon se pas kontaktimit me firmën ligjore të avokatit Tony Buzbee, padia u depozitua pa një hetim të pavarur apo verifikim të mjaftueshëm. Në atë kohë, gruaja pretendonte se ishte përdhunuar nga Carter dhe Combs kur ishte 13 vjeçe, gjatë një feste pas ceremonisë MTV Video Music Awards në vitin 2000. Jay-Z i kishte mohuar që në fillim akuzat, duke i përshkruar si një përpjekje për shantazh që i shkaktoi dëme të mëdha reputacionit të tij dhe familjes së tij. Pas tërheqjes vullnetare të paditëses nga procesi në shkurt 2025, reperi ngriti një padi ndaj saj dhe avokatëve të saj për shantazh dhe dëme të tjera. Megjithëse Jane Doe është hequr tashmë nga kjo padi, procesi ligjor ndaj firmës ligjore të Tony Buzbee mbetet i hapur në Nju Jork. Gruaja theksoi se nuk ka marrë dhe nuk i është premtuar asnjë pagesë për deklaratën e saj të re. Avokati i saj i ri, James Blair Newman Jr., konfirmoi se ajo e kishte identifikuar gabimisht reperin si autor të pretenduar dhe i kërkoi falje publike Jay-Z dhe familjes së tij. Nga ana tjetër, avokati Tony Buzbee ka kundërshtuar pretendimet e gruas, duke deklaruar se disa avokatë kishin folur me të përpara se ai të përfshihej në çështje dhe se ajo u kishte dhënë atyre të njëjtin rrëfim.