Kancelari gjerman Friedrich Merz ndodhet nën presion të shtuar pas raportimeve për pakënaqësi brenda radhëve të Unionit Kristian-Demokrat (CDU). Sipas vlerësimeve, 71% e gjermanëve shprehen të pakënaqur me mënyrën se si kancelari po drejton qeverinë, ndërsa partia e tij po shënon rënie në sondazhet kombëtare krahasuar me partinë e ekstremit të djathtë, AfD.
Figura të rëndësishme të CDU-së po diskutojnë privatisht mundësinë e një ndryshimi në krye të partisë përpara zgjedhjeve të ardhshme federale. Në këtë kontekst, emri i Hendrik Wüst, kryeministrit të landit të Renanisë Veriore-Vestfalisë, përmendet si pasardhës i mundshëm. Wüst, 50 vjeç, konsiderohet si një ndër figurat më popullore të së djathtës gjermane dhe ka arritur të ruajë mbështetjen politike në landin e tij, pavarësisht vështirësive që po kalon partia.
Ditën e premte, Hendrik Wüst i mohoi zërat për një komplot, duke i cilësuar ato si "marrëzi absolute". Ai konfirmoi se kancelari Friedrich Merz gëzon mbështetjen e tij të plotë. Situata brenda CDU-së mbetet në qendër të vëmendjes politike në Gjermani, teksa partia përpiqet të rikthejë besimin e votuesve.