Protesta kundër qeverisë ka vazhduar me pjesëmarrje të lartë edhe gjatë ditëve të fundit në Tiranë. Një ndër elementet më të spikatura të tubimeve ka qenë përdorimi i pankartave me përmbajtje satirike, të cilat qytetarët i përdorin për të kritikuar vendimmarrjen politike dhe raportin mes pushtetit dhe shoqërisë.
Ndër mesazhet më të komentuara në këto pankarta janë shfaqur slogane si:
• “Sa mandate duhen për ujë dhe drita 24 orë?”
• “Piktor, po të del boja”
• “Ne jemi shqiponja, nuk jemi dele”
• “Pas orës 18:00, popullit mos i fol”
• “Nuk është cirk Shqipëria, larg kllounët nga qeveria”
• “Më kërcënuan me vendin e punës, por sërish dola në protestë. Kush është justifikimi yt?”
• “Fuqia e njerëzve, jo e oligarkëve”
Protestuesit kanë shprehur gjithashtu shqetësime mbi presionin ndaj vendit të punës dhe qëndrimin e autoriteteve ndaj qytetarëve. Pavarësisht kohëzgjatjes së protestave, autoritetet nuk kanë raportuar për incidente gjatë zhvillimit të tubimeve. Organizatorët dhe pjesëmarrësit mbeten të vendosur për të vazhduar mobilizimin, duke përdorur humorin dhe ironinë si mjete të shprehjes së pakënaqësisë ndaj ekzekutivit.