Papa Leoni XIV shprehu këtë të dielë, më 22 mars 2026, shqetësim të thellë për luftën e vazhdueshme në mbarë botën, me fokus në Lindjen e Mesme.
Kreu i Kishës Katolike përsëriti thirrjen për armëpushim të menjëhershëm. Ai vlerësoi vdekjet dhe vuajtjet e shkaktuara nga konflikti si një skandal për njerëzimin. "Nuk mund të heshtim përballë vuajtjeve të kaq shumë njerëzve, viktimave të pambrojtura të këtyre konflikteve. Ajo që i lëndon ata, lëndon të gjithë njerëzimin", deklaroi Papa.
Leoni XIV, Papa i parë amerikan, i cili njihet për të folur në mënyrë diplomatike, ka shtuar thirrjet për t’i dhënë fund luftës me Iranin kohët e fundit. Të mërkurën, Vatikani i kërkoi Presidentit të SHBA-së, Donald Trump, të japë fund luftës në zgjerim me Iranin sa më shpejt të jetë e mundur dhe sugjeroi që Izraeli të ndalojë sulmet e tij kundër Libanit.
Konflikti i Lindjes së Mesme, i hyrë në javën e katërt, ka shkaktuar të paktën tre mijë viktima, pjesa më e madhe në Iran dhe Liban. Dhjetëra civilë janë vrarë në Izrael dhe vendet e Gjirit. Mijëra të tjerë raportohet të jenë plagosur, ndërsa qindra mijëra janë zhvendosur, kryesisht në Liban, ku Izraeli vazhdon operacione ushtarake nga ajri dhe toka.