Gjykata Themelore në Ferizaj – Departamenti për të Mitur, nën drejtimin e gjyqtarit të procedurës paraprake Shabi Idrizi, ka miratuar kërkesën e Prokurorisë për caktimin e masës së paraburgimit në kohëzgjatje prej 30 ditësh për të miturin e përfshirë në incidentet e rënda të datës 10 korrik 2026.
Sipas dosjes hetimore, ngjarja filloi rreth orës 07:50 në Parkun e Qytetit në Ferizaj, ku i dyshuari, i maskuar, me dorëza dhe i veshur me rroba ushtarake, sulmoi me thikë shtetasit I.M. dhe S.H., duke u shkaktuar lëndime të rënda trupore në organe vitale. Të dëmtuarit u dërguan me urgjencë për trajtim mjekësor në Spitalin Rajonal të Ferizajt.
Rreth 20 minuta pas sulmit, policia lokalizoi të dyshuarin në oborrin e shtëpisë së gjyshes së tij në fshatin Greme. Gjatë ndërhyrjes për arrestim, i mituri refuzoi të dorëzonte thikën dhe sulmoi zyrtarët policorë A.U. dhe B.R..
Në dosje thuhet se nëna e të miturit, D.Gj., ndërhyri duke tërhequr policin B.R., i cili u rrëzua. Në atë moment, i mituri e goditi me thikë policin. Një major i Policisë ndërhyri për të neutralizuar të dyshuarin dhe konfiskoi thikën e kuzhinës. Prokuroria e ngarkon të miturin me veprat penale të vrasjes në tentativë, sulmit ndaj personit zyrtar dhe mbajtjes në pronësi, kontroll ose posedim të paautorizuar të armëve.