Ditën e premtë, 27 mars 2026, Shqipëria do të ndikohet nga kushte atmosferike të paqëndrueshme. Moti parashikohet me vranësira mesatare deri të dendura, të shoqëruara me intervale të herëpashershme me diell, kryesisht në ultësirën perëndimore.
Reshjet e shiut do të fillojnë që në orët e para të ditës dhe do të vazhdojnë deri në pasditen e vonë, me intensitet të ulët. Herë-herë, në periudha afatshkurtra, ato do të marrin formën e shtrëngatave.
Në zonat malore priten reshje dëbore me intensitet të ulët deri mesatar:
- Në Alpe dhe verilindje, mbi lartësitë e 400-500 metrave;
- Në lindje dhe juglindje, mbi 700-800 metra.
Lokalisht, në Alpe dhe relievet e larta malore, mund të ketë stuhi dëbore të përkohshme. Pas orëve të pasdites vonë, reshjet e shiut dhe dëborës parashikohet të ndërpriten në pjesën më të madhe të territorit.
Era do të fryjë me drejtim nga juglindja në jugperëndim, me shpejtësi mesatare 7 m/s, ndërsa herë-herë do të arrijë deri në 15 m/s. Në det, valëzimi parashikohet 2-4 ballë.
Temperaturat do të jenë të ulëta, me vlera maksimale deri në 13°C dhe minimale në 0°C.