Këtë të hënë priten kushte të paqëndrueshme atmosferike në të gjithë territorin e Shqipërisë. Reshje të dobëta shiu do të përfshijnë qarqet Kukës, Elbasan, Berat, Korçë, Vlorë dhe Gjirokastër, ndërsa në qarqet e tjera reshjet do të jenë të pakta ose lokalisht të dobëta.
Në zonat e veriut, lindjes dhe juglindjes, në lartësitë mbi 600 metra mbi nivelin e detit, reshjet do të binë në formë dëbore, duke krijuar kushte tipike dimërore veçanërisht në zonat malore.
Sa i përket temperaturave, ato do të shënojnë vlera të ulëta. Në zonat bregdetare, temperaturat minimale dhe maksimale do të luhaten nga 0 deri në 5 gradë Celsius. Në zonat e ulëta, minimale pritet të zbresin deri në -3 gradë Celsius, ndërsa maksimalet nuk do të kalojnë 5 gradë. Në zonat malore, temperaturat minimale do të arrijnë deri në -10 gradë Celsius, me maksimale rreth -1 gradë Celsius.
Era do të fryjë e lehtë deri mesatare në pjesën më të madhe të vendit. Në zonat bregdetare dhe malore, era mund të jetë mesatare deri e fortë, sipas disa parashikimeve.