Partia Demokratike Evropiane (PDE), me seli në Bruksel, ka reaguar lidhur me protestat masive që po zhvillohen prej 14 ditësh në Tiranë kundër qeverisë dhe kryeministrit Edi Rama.
Në mesazhin e saj, PDE vlerëson se lëvizja e qytetarëve nuk përbën qëndrim "anti-progres", por funksionim të vetë sistemit demokratik. Sipas organizatës, qytetarët janë mobilizuar për të mbrojtur tokat, transparencën dhe llogaridhënien publike përballë marrëveshjeve të paqarta për zhvillime luksoze.
Institucioni i bën thirrje kreut të qeverisë të dëgjojë me vëmendje kërkesat e protestuesve, duke theksuar se "Evropa nuk ndërtohet duke e trajtuar natyrën si monedhë pazari apo institucionet si pronë private".
"Nëse Shqipëria do Evropën, duhet të zgjedhë të drejtat mbi rrugët e shkurtra, qytetarët mbi betonin dhe shtetin e së drejtës mbi pushtetin", thuhet në deklaratën e PDE-së.