Në kuadër të fushatës për zgjedhjet e parakohshme të 7 qershorit, partitë politike në Kosovë kanë intensifikuar aktivitetet e tyre përmes tubimeve dhe takimeve me zgjedhësit në disa komuna.
Lëvizja Vetëvendosje ka parashikuar tri takime gjatë ditës: në orën 17:30 në Rahovec, në orën 19:00 në Shtëpinë e Kulturës në Suharekë, si dhe në orën 21:00 në shkollën “Ismail Qemali” në fshatin Bellanicë të Malishevës.
Partia Demokratike e Kosovës do të zhvillojë një takim me gratë në orën 16:00 në hotelin “Emerald” në Prishtinë. Më pas, agjenda e kësaj partie vijon me dy tubime të tjera: në orën 18:00 në oborrin e shkollës “Ibrahim Mazreku” në Malishevë dhe në orën 19:30 në sheshin “Fehmi Lladrovci” në Drenas.
Lidhja Demokratike e Kosovës do ta nisë aktivitetin në orën 17:00 në Shtëpinë e Kulturës “Mensur Zyberaj” në Rahovec. Përfaqësuesit e saj do të takohen me qytetarët në Prizren në orën 18:30 në Sheshin e Lidhjes, ndërsa takimi i fundit i kësaj partie është planifikuar për në orën 20:00 në hotelin “Meka” në Dragash.
Së fundmi, Aleanca për Ardhmërinë e Kosovës ka njoftuar mbajtjen e një tubimi zgjedhor në qytetin e Gjilanit.