Një incident i rëndë është shmangur më 19 gusht në një autostradë në provincën Smaland, pranë qytetit Jonkoping, në Suedi. Një autobus që transportonte rreth 50 pasagjerë ka vazhduar lëvizjen pa kontroll, pasi shoferi ka humbur papritur ndjenjat gjatë drejtimit të mjetit, duke mbetur me këmbën mbi pedalin e gazit.
Sipas raportimeve, pasagjerja Maria Hjelte, 63 vjeçe, ka ndërhyrë menjëherë duke kapur timonin për të mbajtur automjetin në rrugë. Në të njëjtën kohë, një pasagjer tjetër, i identifikuar si Niranjan Nithyanandam, ka tentuar të ndihmojë për të marrë kontrollin e autobusit që lëvizte me shpejtësi rreth 90 kilometra në orë.
Ndërhyrja e përbashkët bëri që autobusi të drejtohej drejt barrierës mbrojtëse të autostradës. Përplasja me barrierën ndihmoi në ngadalësimin dhe ndalimin përfundimtar të mjetit, duke bërë që këmba e shoferit të largohej nga pedali. Pas ndalimit të autobusit, ekipet e emergjencës kanë mbërritur në vendngjarje për t'i dhënë ndihmën e parë shoferit.
Sipas policisë suedeze, shoferi dyshohet se ka pësuar një goditje në tru, por më pas ka rifituar vetëdijen dhe është dërguar në spital. Autoritetet, përmes zëdhënësit Mats Pettersson, kanë vlerësuar reagimin e shpejtë të pasagjerëve, duke e cilësuar ndërhyrjen e tyre si vendimtare për shmangien e një tragjedie. Asnjë nga pasagjerët nuk ka pësuar lëndime gjatë këtij incidenti.